နာဂစ်မုန်တိုင်းဒဏ် ခံခဲ့ရသည့် ဧရာဝတီတိုင်းဒေသကြီး ပြင်စလူမြို့နယ်ခွဲရှိ ကျေးရွာ ၁၃ရွာတွင် သောက်သုံးရေ ပြတ်လပ်မှုကြောင့် နေ့စဉ် ရေဂါလန် တစ်သောင်းခန့် ကုန်းကြောင်းမှ ထော်လာဂျီများနှင့် လည်းကောင်း၊ ရေကြောင်းမှ စက်လှေများဖြင့် လည်းကောင်း ပေးပို့နေရကြောင်း နှလုံးသား အခမဲ့ ကျန်းမာရေးစောင့်ရှောက်မှု အဖွဲ့ ဥက္ကဋ္ဌ ဦးအောင်မိုးဝင်းက ပြောကြားသည်။ ကုန်းကြီး၊ နံ့သာကုန်း၊ ဝါးဖူးကုန်း၊ လေယာဉ်ကွင်း၊ ရေလူးဆိပ်၊ သောင်ကလေး၊ တကောင်းဆိပ်၊ အဝစားရွာများအပြင် အနီးအနားရှိကျေးရွာများကို သောက်ရေသွားရောက် လှူဒါန်းနေရကြောင်း ၄င်းက ဆိုသည်။ ပြင်စလူမြို့နယ်ရှိ ရေခန်းနေသည့် သောက်ရေကန်များမှာ မုန်တိုင်းမိုး ရွာပြီးပါက ရေကြည်ရရန် သုံးရက်ခန့် စောင့်ရမည်ဖြစ်ကြောင်း ဦးအောင်မိုးဝင်းက ထပ်လောင်း ပြောဆိုသည်။ မေလ ၅ ရက်နေ့က စ၍ ပို့ဆောင် ပေးနေခြင်းဖြစ်ပြီး မုန်တိုင်းမိုးကြောင့် လပွတ္တာ မြို့နယ်ရှိ မင်္ဂလာသိဒ္ဓိဘုန်းကြီး ကျောင်း၏ သောက်ရေကန် ရေနောက်သွား ပါက ဒေသခံများအတွက် သောက်ရေ အခက်အခဲမဖြစ်စေရန် A1 ရှယ်တာနှင့် MAX ရှယ်တာတို့ရှိ ဂါလန်တစ်သောင်းဆံ့ သောက်ရေကန်များတွင် လေးရက်စာ ရေဂါလန် သုံးထောင်စီ သိုလှောင်ပေးထားကြောင်း သောင်ကြီးရွာမှ ဦးအောင်နိုင်က ပြောဆိုသည်။ ထိုကျေးရွာ ၁၃ ရွာတွင် စုစုပေါင်း နေထိုင်သူ လူဦးရေမှာ ခြောက်ထောင်ခန့် ရှိပြီး အများစုမှာ ကလေးငယ်များ ဖြစ်ကြောင်း ၄င်းကဆိုသည်။ ထိုကျေးရွာများအတွက် သောက်သုံးရေ ပို့ဆောင်ရန် High Class သောက်ရေသန့်နှင့် ယမကာထုတ်သည့် ကုမ္ပဏီက အဓိကပံ့ပိုးကူညီလျက် ရှိကြောင်းလည်း နှလုံးသားအခမဲ့ ကျန်းမာရေး စောင့်ရှောက်မှု အဖွဲ့ထံမှ သိရသည်။ ကုန်းကြီးရွာတွင် ကလေးငယ်များ ရေသောက်သုံးနိုင်ရန် အတွက် ဖခင်ဖြစ်သူ များက သောက်ရေရရှိနိုင်သည့် အရက်ဆိုင်များတွင် အရက်ဝယ်၍ ရေတောင်းသောက် နေရသည်ကို တွေ့ရှိရသောကြောင့် ထိုကျေးရွာ များအတွက် သောက်ရေ လှူဒါန်းပေးခြင်း ဖြစ်ကြောင်း High Class သောက်ရေသန့်နှင့် ယမကာထုတ်လုပ်သည့် ကုမ္ပဏီ၏ ပြင်စလူမြို့နယ်ခွဲ ကိုယ်စားလှယ် ဒေါ်နန်းက ပြောကြားသည်။ လက်ရှိအချိန်တွင် မုန်တိုင်း သတိပေးမှုကြောင့် ပြင်စလူမြို့နယ်ခွဲ အတွင်းရှိ ဆိုင်ကလုန်းရှယ်တာ များသို့ သောက်ရေ ဂါလန်သုံးထောင်နှင့် ဆန်ငါးအိတ်စီ ပေးလှူ ထားကြောင်း ၄င်းကဆိုသည်။ မုန်တိုင်း သတိပေးချက်များ ထုတ်ပြန်သည့် မေလ ၁၂ ရက်နေ့ ကစ၍ ဒေသခံရွာသား အချို့မှာ ဆိုင်ကလုန်း ရှယ်တာနှင့် စာသင်ကျောင်းများသို့ လာရောက် နေထိုင်လျက်ရှိကြောင်း နှလုံးသားအခမဲ့ ကျန်းမာရေးစောင့်ရှောက်မှု အဖွဲ့ ဥက္ကဋ္ဌ ဦးအောင်မိုးဝင်းက ပြောဆိုသည်။ The Voice Weekly  |
0 comments:
Post a Comment