ဗုဒ္ဓဘာသာဝင်များ အထွတ်အမြတ်ထားရာ အိန္ဒိယနိုင်ငံရှိ ဗုဒ္ဓဂယာတွင် ဗုံးကွဲမှုအပြီး ရန်ကုန်တိုင်း ဒေသကြီးရှိ ရွှေတိဂုံစေတီတော်နှင့် မန္တလေးတိုင်းဒေသကြီးရှိ အထင်ကရ ဘုရား၊ စေတီ၊ ပုထိုးများကို လုံခြုံရေး တိုးမြှင့်ချထားဖြစ်ကြောင်း မြန်မာနိုင်ငံ ရဲတပ်ဖွဲ့ထံမှ စုံစမ်း သိရှိရသည်။
ဗုဒ္ဓဂယာတွင် ပေါက်ကွဲမှုများ ဖြစ်ပွားခဲ့သဖြင့် နိုင်ငံတော်နှင့် နိုင်ငံသားတို့ကို ကာကွယ်ရန်အတွက် လုံခြုံရေးအရ စီမံဆောင်ရွက်မှုများ လုပ်ဆောင်နေသည်မှာ မှန်ကန်ကြောင်း၊ သို့သော် မည်ကဲ့သို့ ဆောင်ရွက် မည်ကို လုံခြုံရေးအရ အသိပေး ပြောဆိုနိုင်ခြင်း မရှိကြောင်း နိုင်ငံတော် သမ္မတ၏ ပြောရေးဆိုခွင့်ရှိသူ ဦးရဲထွဋ်က The Voice သို့ ပြောကြားသည်။
ရွှေတိဂုံစေတီတော်တွင် လုံခြုံရေး တိုးမြှင့်ချထားရန် ဇူလိုင်လ ၈ ရက်နေ့ ညနေ ၃ နာရီခန့်က အဆိုပါ ဘုရား ရုံးခန်းတွင် ရန်ကုန်တိုင်းဒေသကြီးမှ အစိုးရအဖွဲ့များ၊ ရန်ကုန်တိုင်း ရဲတပ်ဖွဲ့မှူးရုံးမှ အကြီးတန်း တာဝန်ရှိသူများ က အစည်းအဝေး ပြုလုပ်ကာ ဆွေးနွေး တိုင်ပင်ခဲ့ကြောင်း ရွှေတိဂုံစေတီတော် ဂေါပကရုံးမှ တာဝန်ရှိသူ တစ်ဦး၏ ပြောကြားချက်အရ သိရသည်။
“လက်ရှိထက် လုံခြုံရေးကို ပိုပြီး တိုးမြှင့်မယ်။ သက်ဆိုင်ရာ ဂေါပကအဖွဲ့ နဲ့ ပြည်သူ့ ရဲတပ်ဖွဲ့ ပူးပေါင်း ဆောင်ရွက်သွားပြီး ရဲတပ်ဖွဲ့ရဲ့ စီမံအုပ်ချုပ်မှုနဲ့ လုပ်ဆောင်သွားမှာပါ။ ဗုဒ္ဓဂယာမှာ ဗုံးပေါက်လို့ ချည်းရယ်လို့ မဟုတ်ပါဘူး။ အာဇာနည်နေ့ လုံခြုံရေးအတွက်လည်း ပါပါတယ်။ အင်အား ဘယ်လောက်နဲ့ ဘယ်လို ဆောင်ရွက်သွားမယ် ဆိုတာကိုတော့ လုံခြုံရေးအရ ပြောပြလို့ မရဘူး” ဟု ၎င်းက ပြောကြားသည်။
အဆိုပါကိစ္စနှင့် ပတ်သက်၍ ရန်ကုန်တိုင်းဒေသကြီး အစိုးရ အဖွဲ့နှင့် မြန်မာနိုင်ငံ ရဲတပ်ဖွဲ့သို့ အကြိမ်ကြိမ် ဖုန်းဆက် မေးမြန်းသော်လည်း တာဝန်ယူ ဖြေကြားခြင်း မရှိပေ။
“မန္တလေးမြို့မှာဆိုရင် ဘုရားကြီး၊ ပြင်ဦးလွင်မြို့မှာဆိုရင် မဟာအံ့ထူးကံသာ ဘုရား၊ ကျောက်ဆည်မြို့ မှာဆိုရင် ရွှေသိမ်တော်ဘုရား၊ ညောင်ဦးမြို့မှာ ဆိုရင် ပုဂံဘုရားတွေမှာ လုံခြုံရေး သတိထားဖို့ သက်ဆိုင်ရာ ခရိုင်အလိုက် ညွှန်ကြားထားတယ်” ဟု မန္တလေးတိုင်းဒေသကြီး ရဲတပ်ဖွဲ့မှူးရုံးမှ ရဲမှူး ဦးစိုးငြိမ်းက ပြောကြားသည်။
မန္တလေးတိုင်းဒေသကြီးအတွင်းရှိ အထင်ကရရှိသည့် ဘုရားများကို လုံခြုံရေး ယခင်ကထက် ပိုသတိထားရန်နှင့် နေ့ည လုံခြုံရေး လှည့်ကင်း များ ဆောင်ရွက်ရန် ညွှန်ကြားထားကြောင်း ၎င်းက ရှင်းပြသည်။
The Voice Weekly
0 comments:
Post a Comment